የሲዳማ ክልል ጤና ቢሮ
ጥር 04/2017 ዓ.ም

በይርጋዓለም ሆስፒታል ህክምና ኮሌጅ የተገነባውን የኦክስጂን ማምረቻ ፋብሪካ የሲዳማ ብሔራዊ ክልላዊ መንግስት ርዕሰ መስተዳድር አቶ ደስታ ሌዳሞ መርቀው ስራ አስጀምረዋል።

ርዕሰ መስተዳድሩ እንደገለፁት የኦክሲጂን ማምረቻ ፋብሪካው ግንባታ መንግሥት ለጤና አገልግሎት መሻሻል የሚያደርገውን ጥረት እንደሚያሳይ ገልፀዉ፥ ይህም የጤና አገልግሎት ጥራትን እንደሚያሳድግ ተናግረዋል።

ርዕሰ መስተዳድሩ አክለው እንደገለፁት የኦክስጂን ማምረቻ ፋብሪካው የኦክስጅን ምርቱ በሆስፒታሎች የሚታየውን የኦክስጅን እጥረት ከመቅረፍ ባሻገር በጤና ችግሮች ምክንያት ሊከሰት የሚችል ህመም እና ሞት የሚቀንስ መሆኑን ገልጸዋል ።

የኢፌድሪ ጤና ሚኒስቴር ሚኒስትር ዶ/ር መቅደስ ዳባ በበኩላቸው በህክምናው ረገድ ከመተንፈሻ አካላት ህመም፣ ከቀዶ ህክምና እና ከሌሎች ከባድ ህመሞች ጀርባ የኦክስጅን አስተዋጽኦ እጅግ ከፍተኛ ነው ብለዋል።

በዚህ ረገድ 86 ሚሊየን ብር ወጪ የተደረገበት የኦክስጅን ማምረቻ ፋብሪካው በቀን 192 ባለ 50 ሊትር ሲሊንደር ጥራት ያለው ኦክስጂን የማምረት አቅም ያለው መሆኑን ትልቅ ዕምርታ መሆኑን ክብርት ሚኒስሯ በንግግራቸው አመላክተዋል ።

ፋብሪካው ከሆስፒታሉ ባሻገር በአከባቢው ለሚገኙ ለሌሎች አስር የጤና ተቋማትም ኦክስጅን ተደራሽ ማድረግ መቻሉ የአገልግሎት ተደራሽነትን ለማስፍፍት እንደሚረዳ ተብራርቷል ።

የኦክስጅን ማምረቻ ፋብሪካው ተገንብቶ ለአገልግሎት መብቃት ለአካባቢዉ ማህበረሰብ፣ አጎራባች አካባቢዎች እንዲሁም አንደ ሀገር አቀፍም የሚኖረዉ አስተዋጽኦ የጎላ መሆኑን የሲዳማ ክልል ጤና ቢሮ ኃላፊ ዶ/ር ሰላማዊት መንገሻ ተናግረዋል ።

የኦክስጂኑ መመረት ህብረተሰቡ የሚፈልገውን አማራጭ ህክምና እውን ከማድረግ ባሻገር፣ የህብረተሰቡን የጤና ችግር ሳይወሳሰብ መፍትሄ ለመስጠትና ካልተጠበቀ ጊዜና ጉልበት ወጪ ለመታደግ ያግዛል ብለዋል ዶ/ር ሰላማዊት አክለውም የኦክስጅን ማምረቻ ፋብርካው ከሆስፒታሉ ፍጆታ በላይ 3/4ኛውን ወይም ሶስት አይሱዙ ኦክስጅን በየቀኑ ለሌሎች አሥር ሆስፒታሎች ሳይቋረጥ እያመረተ ሊያቀርብ የሚችል ዐቅም እንዳለው ገልጸዋል ።

በምረቃው ስነ ስርዓት ላይ ርዕሰ መስተዳድሩንና ሚኒስትሯን ጨምሮ ፣ የክልሉ አፈጉባኤ ክብርት ወ/ሮ ፋንታዬ ከበደ ፣ የጤና ሚኒስትር ዴኤታ ወ/ሮ ፍሬህይወት አበበ ፣ የሲዳማ ክልል ጤና ቢሮ ኃላፊ ዶ/ር ሰላማዊት መንገሻ የክልሉ ጤና ቢሮ የማኔጅመንት አባላት፣ የሆስፒታሉ ሰራተኞችና አስተዳደር አካላት፣ የሃይማኖት አባቶች፣የሆስፒታሉ ቦርድ አባላት ፣ የአገር ሽማግሌዎች እና ሌሎችም ጥሪ የተደረገላቸው እንግዶች መገኘታቸው ታውቋል።

የሲዳማ ክልል ጤና ቢሮi